Die Krynauw familiewapen

deur David Willem Krynauw (03/02/1908)

“Twee gekruiste visse met die koppe omhoog met ‘n regopstaande vis daarbo-oor, eweneens met die kop omhoog.  Helmteken: ‘n regopstaande vis.  In die Africana-Museum is daar egter ook ‘n ander afbeelding van die Krynauw-familie-wapen.  “Skuinsgedeel en in skilletboog belaai met ‘n gaande en aansiende leeu. Helmteken twee vlerke (in vlug). Die Engelse weergawe is: “Per bend on a chief a lion passant guardant. Crest: A pair of wings.”  In die boek:  Die wapens van ou Afrikaanse families deur C Pama – word hierdie verskil in behandeling geneem onder die hoof:

Die Bell-Krynauw-Versameling

Charles Davidson Bell is in Skotland gebore in 1813. Hy arriveer aan die Kaap in 1829. Hy was veelsydig in aanleg, ‘n verdienstelike skilder, maar by uitstek tekenaar. In 1848 word hy aangestel as Landmeter-Generaal, nadat hy sedert 1840 verskeie senior poste in hierdie kantoor beklee het. Hier het hy in noue aanraking gekom met die Krynauw-familie aan die Kaap. Daniël Krynauw was die Assistent Landmeter-Generaal en sy broer J C Krynauw was die boekhouer in hierdie kantoor. In 1859 tree Bell in die huwelik met hulle suster Helena Krynauw.

Ter aandenking van hierdie huwelik het Bell ‘n koper skinkbord vervaardig, of laat vervaardig. Daarop het hy in die middel van die skinkbord die gekomineerde wapens van die Bell en Krynauw-wapens aangebring asook die vier kwartierwapens. Bell-Hamilton en Krynauw- Gie. Bell se ouers en sy vrou se ouers.

Bell het ook ‘n groot aantal kwartierwapens in die rand van die skinkbord aangebring. Hierdie skinkbord met familiewapens beskou Pama as uiters interessant en uniek. Dit verbaas dus nie dat dit ‘n ereplek gevind het en steeds opgeberg word in die Africana Museum in Johannesburg nie.

Bell het in 1872 sy pos aan die Kaap neergelê en na Skotland teruggekeer waar hy in Edenburgh oorlede is op 7 April 1882 en Daniël Krynauw is as sy opvolger benoem as Landmeter-Generaal. Gelukkig het die reusewerk wat Bell verrig het nie verlore geraak nie – omdat Bell die hele versameling aan Daniël Krynauw bemaak het. Daniël Krynauw het voortgebou en Bell se werk tesame met sy eie bydrae soos volg gesertifiseer. “The above drawings are true copies of the impressions on sealing wax of the Coats-of-Arms of the old Dutch and French-Hugenot families of the Cape, from the old seals as exhibited by and at present retained by relatives and other interested, of the old proprietors – by me. D KRYNAUW – Government Surveyor, Cape Colony, Cape of Good Hope – September 1901.

Na sy dood het sy dogter die versameling geskenk aan die Koopmans-De Wet Huis waar dit deur die jare veilig opgeberg was. In hierdie versameling word die visse aangedui as die regte wapen van die Krynauw-familie. Om die een of ander rede moes Bell dus, nadat hy die wapens op die koper skinkbord aangebring het, en die tyd toe hy die Kaap verlaat het, nadat hy sy hele versameling familiewapens aan Daniël Krynauw oorhandig het, aangaande die Krynauw-wapen tot ‘n heeltemal ander gevolgtrekking gekom het. Pama beweer dat die wapen op die skinkbord in die Africana Museum dié is van die Franse Crissenoy Familie en dat Bell verkeerdelik moes gedink het dat die Krynauws ‘n tak was van daardie familie. Toe Bell later agterkom dat die Krynauw stamvader van Duitse afkoms was, het sy studie ‘n ander rigting ingeslaan”

Sien epos oor die Familiewapen by Kommentaar